Сэтинньи 27 күнүгэр "Аргыс" сынньалан киинигэр Уһун-Күөл бөһүөлэгин «Далбар Хотуна» Валентина Васильевна Стрекаловская бэйэтин ис - сүрэгиттэн иэйэн, айан таһаарбыт "ОЛОХ СЫЛААС ТЫЫНЫНАН УГУТТАММЫТ ХОһООННОР" диэн хоһооннорун хомуурунньуга кинигэтин сүрэхтиир дьоро киэһэ нэһилиэкпитигэр ыытылынна.
Валентина Васильевна - СӨ үөрэҕириитин туйгуна, Уһун-Күөл орто оскуолатын үрдүк категориялаах саха тылын уонна литературатын учуутала, "Төрөппүт биһириир учуутала", "Үерэнээччи биһириир учуутала", "Уус-Алдан улууһун учууталлар идэлээх сойуустарыгар киллэрбит кылаатын иһин" бэлиэ хаһаайката, педагогическай үлэ бэтэрээнэ, саҥа кинигэ автора.
Кинигэ сүрэхтэниитин олохтоох бибилэтиэкэ бибилэтиэкэрэ Марияна Николаевна Алексеева, оскуолабыт үөрэҕин завуһа Марина Николаевна Данилова иилээн - саҕалаан ыыттылар.
Истиҥ иһирэх тэрээһиҥҥэ , I Өспөх нэһилиэгин дьаһалтата, оскуолабыт коллектива, оскуолабыт үөрэнээччилэрэ, Аргыс сынньалаҥ киинин үлэһиттэрэ, нэһилиэк олохтоохторо, уонна Валентина Васильевна дьиэ –кэргэнэ кытыыны ыллылар, автор хоһоонноруттан аахтылар. Үтүө баҕа санааларын эттилэр. Валентина Васильевна өр сылларга саха тылын уонна литературатын учууталынан үлэлээн кэллэ. Бу сыллар тухары оҕолору кэрэ эйгэҕэ уһуйан, үтүөҕэ сырдыкка угуйан кэллэҕэ. Айар талааннаах киһи барытыгар сыстаҕас буолар дииллэринии, Валентина Васильевна хоһоону суруйарын таһынан өбүгэ үтүө үгэһин дьарык оҥостон туоһунан араас иһиттэри тигэр иистэнэр уруһуйдуур. Бу күн үлэлэрин быыстапката тардыллан дьон хараҕын сымнатта, сылаас иэйиини уһугуннарда. Быыстапкаҕа кинигэ уруһуйун автора Ф.И.Авдеева аатынан Оҕо дыбарыаһын эбии үөрэхтээһин киинин педагога Лена Васильевна Пинигина ( Валентина Васильевна бииргэ төрөөбүт балта) уруһуйдара эмиэ туран дьон сэҥээриитин ылла. Бу күн Валентина дьиэтээҕи кинигэлэриттэн ийэлээх аҕатыгар анаан бииргэ төрөөбүттэр таһааттарбыт альбом кинигэлэриттэн саҕалаан бииргэ үөрэммит, үлэлээбит сылларын туоһулуур кинигэлэр, хоһоон күрэгэр кыттыбыт хоһоонноро бэчээттэммит кинигэлэрэ , журналлара, олоҕун аргыһа Ян Николаевич Стрекаловскай оҥорбут "Хатыламмат хаар, муус оҥоҺуктар" хаартысканан быыстапкалара кэлбит дьон болҕомтотун тартылар.
Бу бэлиэ күҥҥэ кэлбит ыалдьыттар , нэһилиэк олохтоохторо, оҕолоро, бииргэ төрөөбүт балтылара Лена Васильевна, Екатерина Васильевна Пинигиналар эҕэрдэ кэс тылларын эттилэр , ааптар хас биирдии хоһооно дьиҥ олохтон ылыллыбыт буолан, киһини толкуйдаталлар дириҥ ис хоһоонноохтор диэн эгэрдэ эппит дьон бэлиэтээтилэр, кэс тылларын эттилэр. Саҥа кинигэ сүрэхтэниитин кыттыылаахтара үгүһү билэн-көрөн, хомуурунньуктан викторинаҕа кыттан, дууһалыын сынньанан, кинигэ бэлэх тутан астынан тарҕастылар.
